“Rio Tinto”-ийн зах зээлийн үнэлгээ 103 тэрбум ам.доллароор хэмжигдэж байна.
“Rio Tinto” болон “Glencore” компани бизнесээ нэгтгэхээр анхан шатны яриа хэлэлцээ хийснийг ойрын эх сурвалж “Bloomberg”-т мэдээллээ.
Хэрэв амжилттай болбол энэ нь уул уурхайн салбарын түүхэн дэх хамгийн том хэлцэлд тооцогдож, одоогийн тэргүүлэгч “BHP”-ийг ардаа орхих нүсэр компани бий болох аж. Хоёр компанийн хэлэлцээ одоо үргэлжилж байгаа эсэх нь тодорхой бус байгаа юм.
Дэлхийн уул уурхайн хоёр дахь том компани “Rio Tinto”-ийн зах зээлийн үнэлгээ сүүлийн байдлаар 103 тэрбум ам.доллароор хэмжигдэж буй бол “Glencore”-ийн үнэлгээ 55 тэрбум орчим ам.доллар байна.
Дээрх мэдээлэл гарсны дараа “Rio Tinto”-ийн Сиднейд бүртгэлтэй хувьцааны ханш 1.8 хүртэлх хувиар унасан бол “Glencore”-ийн АНУ-д бүртгэлтэй хувьцаа 8.7 хувиар өсжээ.
